AmiranIgenni & Tallunt

Aḍu n Yebṭer lqay 3000 n yikilumitren – Tazrawt

Aḍu yellan deg tesfifin n usigna n wemtiweg n Yebṭer d alqayan 3.000 n yikilumitren, ɣef wakken ay d-tekcef yiwet n tezrawt.

Mi ara d-nwali amtiweg n Yebṭer seg tallunt, yettban-aɣ-d yebḍa d tisfifin tinegliyin yesɛan initen yemgerraden yernu tezzint s tazzalin yemgerraden. Tisfifin-a n usigna ttgent-tent-id waḍuten ay yetteddun deg tniliwin yemgerraden, seg wegmuḍ ɣer utaram deg kra n tesfifin, neɣ seg utaram ɣer wegmuḍ deg tesfifin niḍen. Imesnallunen llan ur ẓrin ara ayɣer ay tettemgerrad tnila n waḍuten-a seg tesfift ɣer tayeḍ, am wakken ur ẓrin ara acḥal ay lqayit waḍuten n Yebṭer.

« Aya d asurif ameqran. Ass-a, negza dakken imtiwgen imurrigen iɛejgulen sɛan ammas ay yettezzin tuzzya d tamsuredt (…) am wakken ay sɛan aḥric d uffiɣ aydeg llan wasunen ay tezzin s tazzalin yemgerraden”, ɣef waken ay d-yessegza Tristan Guillot n Usanay n Coîte d’Azur deg Fṛansa, ay yettekkan deg tezrawt-a ay d-yeffɣen ass n laṛebɛa deg tesɣunt tabriṭanit n Nature.

Tignewt n Yebṭer tettgensis-d azal n 1% seg tkennurt tummidt n wemtiweg-a. Ma d tignewt n Wakal tettgensis-d tis amelyun seg tkennurt n wemtiweg-nneɣ ɣef waken ay d-yenna Yohai Kaspi ay yettekkan daɣ deg tezrawt-a.

Imi aḍuten-a sɛan telqey meɣɣren anect-a akk, aya yesskanay-d dakken igran n tjebda n Yebṭer sɛan tarujjurt meɣɣren.

Ɣef leḥsab n tezrawt-a, ssawḍen ad d-sseknen yemnadiyen-a dakken ul n Yebṭer yemgerrad aṭas ɣef wayen ay nettwali deg tjumma-nnes: ul n wemtiweg-a d axaluḍ amengan n uhidṛujin d uhelyum ay yettezzin s tamekt tamsuredt am waken ara tezzi tfekka taqurant.

Tasenqadt tallunant tamarikanit n Juno tessaweḍ ad tafeg nnig yesfuyla n Yebṭer yernu tqerreb armi ay tuweḍ ddaw 5.000 n yikilumitren nnig usigna n tegnewt tunnigt n wemtiweg-a.

Seg yisefka ay d-telqeḍ tsenqadt-a yernu yura-d Alberto Adriani (n Usudu Aɣelnaw n Tsengama Tasnallunant n Ṭṭalyan) deg yiwen n umagrad dakken asfaylu n ugafa n Yebṭer llan 8 n yigengamen ay la yettezzin ɣef yiwen kan n ugengam ameqran, ma d asfaylu n wenẓul n Yebṭer yesɛa 5 n yigengamen iɛejgulen ay la yettezzin fell-as.

« Timṣukin tigengamanin ay la nettwali zzint-d ɣef yesfuyla n Yebṭer ur llint ara akk deg kra n wemtiweg niḍen n unagraw afukan”, ɣef waken ay d-yenna Alberto Adriani.

D acu kan, ur neẓri laṣel n yigengamen-a wala ssebba ayɣef ay tettiɣzif tmeddurt-nsen aṭas.

« Ulac ccekk dakken d Yebṭer ay d amtiweg amezwaru ay d-yulɣen seg tagut tafukant yernu agzay n wemtiweg-a d asurif amezwaru i wegzay n walluɣ n unagrawnneɣ afukan s timmad-nnes”, ɣef waken ay d-yenna Alberto Adriani.

Imegraden yettaken anzi

Bouton retour en haut de la page