Igenni & Tallunt

Aḥric seg tfekka n wemdan tella deg-s tenga tagermazellawt – tazrawt

Tekcef-d yiwet n tezrawt ay d-yeffɣen ass n lexmis deg Monthly Notices of the Royal Astronomical Society, dakken azal n wezgen seg tenga n Webrid n Walim (amazellaw-nneɣ) yekka-d seg yimazellawen ubɛiden yernu tenna-d tezrawt-a dakken yal yiwen seg-neɣ yesɛa aḥric seg tfekka-nnes yekka-d seg tenga tafeɣmazellawt.

« Azal n wezgen n yibelkimen ay d-yezzin fell-aɣ – deg unagraw afukan, Akal d yal yiwen seg-neɣ- ur yelli d tanga n umazellaw-nneɣ, wanag d tin n yimazellawen niḍen », ɣef wakken ay d-yenna Claude-Andre Faucher-Giguere, n Weinberg College of Arts and Sciences yernu d ameskar yettekkan deg tezrawt-a.

Seg ussimeɣ aselkiman s 3 n tsektiwin, sseknen-d yemnadiyen dakken iṭṭerḍiqen imeqranen n yetran ttzellin-d aṭas n wurrig, yernu aṭṭerḍeq-a yezmer ad yessiweḍ ibelkimen ula seg umazellaw ɣer wayeḍ.

« Yezmer lḥal mliḥ ad yili umur ameqran seg tenga n Webrid n Walim yella deg yimazellawen niḍen uqbel ma yuwey-it-id waḍu ijehden », ɣef wakken ay d-yenna welɣu n Daniel Angles-Alcazar n tesdawit n Northwestern deg Yiwanaken Yeddukklen, yernu d imttekki deg tezrawt-a.

Assekki-a ameqran n tenga s waḍu amazellawan yeqqim acḥal n yimelyaṛen n yiseggasen akken ad d-yili yernu yezmer ad yili yefka-d arma d 50% seg tenga n yimazellawen imeqranen, ɣef wakken ay d-tebder tezrawt-a.

« Tazrawt-a tettbeddil afham-nneɣ ɣef walluɣ n yimazellawen deffir Uṭṭerḍeq Ameqran (abigbang) », ɣef wakken ay d-yenna Claude-Andre Faucher-Giguere, ay yettwalin dakken amur meɣɣren seg tenga ayyes nettwaxdem yekka-d seg wanda niḍen yernu maci seg umazellaw-nneɣ, akken ay ɣilen zik yimassanen.

Ɣef leḥsab n teẓri ay icaɛen uqbel, deffir Uṭṭerḍeq Ameqran (abigbang) ay d-yellan 14 n yimelyaṛen n yiseggasen aya, ameɣrad yella yeččuṛ d urrig aydeg llan yiferdisen d ifessasen am uhidṛujin d uhilyum. Maca deffir ma kkant timaḍ n yimelyunen n yiseggasen, yemlal wurrig-a akken ad d-yeg itran d yimazellawen.

« Imi aḥric seg tenga ayyes ay d-nettwaxdem yezmer ad d-yekk seg yimazellawen niḍen, nezmer ad neḥseb iman-nneɣ d imsiklen n tallunt neɣ d iminigen igermazellawen », ɣef wakken ay d-yenna Daniel Angles-Alcazar.

Bouton retour en haut de la page